Esti artículu ta escritu n»asturianu. Si quies velu n’eonaviego, calca equí.
Dende la Intersindical Asturiana queremos treslladar públicamente la nuesa solidaridá de clas colos y les trabayadores de la factoría d’ENCE en Navia y coles sos families, que nestos momentos tán sufriendo l’amenaza d’un axuste que se pretende pagar con empléu, con derechos y col futuru de la comarca.
N’Asturies sabemos bien lo que significa qu’una empresa anuncie recortes y despidos cuando vienen mal daes: viviémoslo demasiaes vegaes. Y tamién sabemos que cada puestu de trabayu que se pierde nun ye solo un númberu nuna fueya de cálculu: ye una vida puesta en tensión, un llar al que-y falten ingresos, una mocedá a la que se-y zarren puertes, un pueblu que se vacía y un texíu productivu que s’afeble.
Poro dicimos alto y claro: nun aceutamos que la salida a los problemes se faiga a costa de los/les d’embaxo. Los axustes de plantía nun puen xustificase so discursos de competitividá, eficiencia, reorganización o supuesta modernización productiva si lo qu’impliquen ye destruir empléu y precarizar condiciones. Nun se pue falar de “proyeutu industrial” mientres s’afeble la base que lo sostién: la plantía.
Esiximos una solución inmediata que pase por:
– Retirada de los despidos y de cualesquier midida de recorte de plantía.
– Garantía de continuidá del empléu pa tolos y toles trabayadores con recolocaciones reales si hubiera cambeos organizativos, y ensin mengües salariales nin empeoramientu de condiciones.
– Negociación de bona fe col comité y coles organizaciones sindicales, con tresparencia sobre cuentes, planes productivos y necesidaes reales.
– Compromisos públicos de caltenimientu de l’actividá y del empléu na comarca, con responsabilidá social y territorial.
Facemos un llamamientu al Principáu y al conxuntu de les instituciones pa que s’impliquen de mou efectivu: cuando una empresa pretende facer un axuste masivu, la neutralidá nun esiste. O se defiende’l trabayu y la vida de la xente, o se dexa que paguen la crisis quienes menos responsabilidá tienen.
La llucha d’ENCE Navia nun ye un asuntu “d’una fábrica”: ye una llucha pol derechu a vivir y trabayar n’Asturies, por una industria que nun funcione como una puerta xiratoria de ganancies privaes y sacrificios colectivos, onde los beneficios acaben siempres en manes de la burguesía, pero les pérdides págales la clase trabayadora. Si toquen a unu, tócannos a toos.
A too ello súmase un fechu que nun se pue obviar: ENCE recibió nos últimos años alredor de 50 millones d’euros en subvenciones y ayudes públiques. Ye llexítimo entrugase ónde foi parar esi dineru y pa qué sirvió. Si eses ayudes taben destinaes a meyorar la producción, modernizar instalaciones o garantizar la viabilidá industrial y l’empléu, ¿cómo s’esplica qu’agora se planteguen despidos masivos? ¿Ye llexítimo aceptar decenes de millones d’euros de dineru públicu y, al tiempu, echar a más de 90 trabayadores a la cai?
Recordemos que’l valor económicu d’una industria ye muncho más que los beneficios empresariales. Cada despidu tien un coste colectivu qu’acabamos asumiendo como sociedá nel so conxuntu: nes prestaciones pol desemplegu —imprescindibles y necesaries pa garantizar la dignidá de quienes pierden el so trabayu—, na perda de producción, na destrucción d’empléu indirectu y na mengua del texíu económicu local. Nun ye solo un problema social: ye un aprobecimientu global.
En comarques como l’occidente asturianu, estos procesos tienen amás un efeutu multiplicador especialmente grave: cada empléu industrial que se pierde acelera la despoblación, amenorga servicios, espulsa población mozo y refuerza la concentración nes grandes urbes, incrementando los costes económicos y sociales de xestionar un territoriu cada vegada más desigual y desequilibráu. La perda económica y social p’Asturies ye inasumible. Si’l capital priváu nun respuende, igual-y toca facelo al públicu: nacionalización.
La Intersindical Asturiana va tar al llau de los y les trabayadores na cai y onde faiga falta. Sofitamos les movilizaciones y facemos un llamamientu a la participación. Porque namás con organización, unidá y solidaridá de clas se frena’l xantaxe patronal.
Nin un despidu.
Nin un retrocesu.
Trabayu dignu, industria con futuru y derechos pa la clas trabayadora.