La Intersindical Asturiana solidarízase coles families y colos compañeros de los dos mineros fináos en Veiga de Rengos.

La Intersindical Asturiana llamenta fondamente’l fallecimientu de dos trabayadores na mina de Veiga de Rengos, en Cangas del Narcea, como consecuenciia del gravísimu accidente asocedíu nesta tarde. Queremos tresmitir tol nuesu cariñu y la nuesa solidaridá a les sos families, a los sos compañeros y compañeres de tazu y al conxuntu del vecinderu afeutáu.

Esti nuevu sinestru llega pocos meses tres de la traxedia de Zarréu/Cerredo, na que perdieron la vida cinco mineros, y torna poner nel centru del discutiniu la seguridá nes esplotaciones mineres del suroccidente asturianu y, en xeneral, en tolos centros de trabayu de la nuesa tierra. Cada muerte nel trabayu ye una firida bien fonda pa la clas trabayadora.Ensin ánimu de señalar culpables concretos y a la espera de que les investigaciones oficiales clarifiquen con rigor les causes del derrumbe y, nel so casu, les responsabilidaes que pudieren derivase, sí queremos denunciar, una vegada más, una realidá que se repite: les consecuencies de los “accidentes llaborales” caen siempres del mesmu llau, sobre quien tien de vender la so fuercia de trabayu pa poder vivir, ente que los beneficios empresariales se xustifiquen nun supuestu “riesgu del capital” que casi enxamás asumen quien se tán lucrando.

Ye inaceptable que, en plenu sieglu XXI, se siga morriendo nel tazu. Esiximos una investigación inmediata, independiente y tresparente, con participación de la representación de los trabayadores, que mire non namás les circunstancies concretes d’esti derrumbe, sinón tamién les condiciones de trabayu, la organización de la producción, los medios de prevención y l’actuación de les distintes alministraciones implicaes. Si se constata dalgún incumplimientu, la depuración de responsabilidaes empresariales ya institucionales tien de ser exemplal.Queremos reconocer espresamente la llabor de la Brigada de Salvamentu Mineru y del conxuntu de los equipos d’emergencia que, una vegada más, xugaron la vida entrando na mina pa rescatar a los sos compañeros. Ye intolerable que quien asumen esti riesgu sufran impagos, recortes y falta d’apoyu políticu ya institucional.La Intersindical Asturiana reafirma’l so compromisu cola llucha contra la sinestrialidá llaboral y cola defensa de la vida y la salú de la clas trabayadora.

Nun aceutamos que se normalice que dir a trabayar pueda significar nun volver a casa. Ellos pon el capital; nós, los muertos. Ye hora de cambiar unes rellaciones llaborales que sigan siendo radicalmente asimétriques.Que la tierra seya lleve pa los compañeros caíos. Nun vamos escaecelos.