Dende la Intersindical Asturiana manifestamos la nuestra condena rotunda a los ataques impulsaos pol Gobiernu de los Estaos Xuníos contra la República Bolivariana de Venezuela.

Denunciamos qu’esta escalada inscríbese nuna política continuada d’inxerencia: sanciones, bloqueos, operaciones de desestabilización y violencia contra pueblos qu’exercen el so derechu a decidir el so futuru ensin tuteles esternes.

Señalamos, amás, la estrema gravedá del secuestru del presidente venezolanu, Nicolás Maduro, per parte de los Estaos Xuníos: un fechu qu’espresa una lóxica imperialista empobinada a imponer axendes dende fuera, controlar recursos y quebrar la voluntá popular. Venezuela tien derechu a vivir ensin amenaces, ensin asfixa económica y ensin agresiones.

Estos ataques suponen una clara violación del derechu internacional. Una vegada más, los Estaos Xuníos imponen la so voluntá al mundu ensin respetar la llegalidá. Cuando Benjamin Netanyahu (que sí tien una orde d’arrestu internacional dictada pola Corte Penal Internacional) pisó suelu estadounidense, non solo nun foi deteníu y puestu a disposición xudicial, sinón que foi tratáu con honores. Ellí, los Estaos Xuníos ignoraron la llegalidá internacional pa dexar llibre a un xenocida. Agora vuelven vulnerala pa capturar a Nicolás Maduro. Queda claro que los Estaos Xuníos actúen pa favorecer a los sos amigos y castigar a quien consideren enemigos ensin respetar nin un palmu la llei.

Nun hai democracia ensin Estáu de derechu; nun hai democracia ensin llei. Los Estaos Xuníos pretenden imponer al mundu una tiranía internacional.

La clas trabayadora conoz bien, pola esperiencia histórica, quién paga’l preciu de la guerra y de les sanciones: nun lu paguen les élites, sinón los pueblos. Quienes viven del so trabayu, quienes sostienen la vida cotidiana y lluchen por salarios, salú, educación y dignidá, son quienes sufren les consecuencies de los intereses que alimenten estes ofensives. Atacar a un país soberanu ye tamién golpiar a la propia clas trabayadora internacional.

Reivindicamos la paz non como consigna balera, sinón como una conquista popular inseparable de la xusticia social. Nun pue haber paz real si se vulnera la soberanía de les naciones y se sustitúi la voluntá de los pueblos pola imposición y la fuerza. El nuesu pacifismu de clas namás pue ser antiimperialista.

Espresamos la nuesa solidaridá col pueblu venezolanu y coles sos instituciones llexítimes énte les presiones esternes, les agresiones militares y los secuestros políticos.

Reafirmamos el nuesu compromisu cola unidá y facemos un llamamientu a la movilización de la clas obrera internacional contra la guerra y l’imperialismu, en defensa de la paz y la soberanía popular.

¡Non a la guerra! ¡Non a l’agresión imperialista!