Dende la Intersindical Asturiana solidarizámonos con tolos y toes trabayadores d’El Arco, asina como coles sos families. Una vegada más, vese la falacia de que’l empresariu merez quedase con una desproporcionada parte de los beneficios por ser “el que arriesga”. Nel casu de Zarréu yá vimos que somos los trabayadores los que ponemos en riesgu la nuesa integridá física y les nueses vides. Agora, como con cada zarru d’una empresa del tamañu d’El Arco, vemos cómo los trabayadores queden ensin el so mediu de vida a causa de la mala xestión económica de los patronos, que nun suelen salir arruinaos d’estes quiebres. Veremos a trabayadores pasalo mal, tar nel paru y pasar una mala temporada, pero nun veremos a la patronal (que tanto dicía que arriesgaba’l so capital) tar nel paru, rellenar con agua’l xabón de manes pa que dure más, buscar desesperadamente les ufiertes del súper pa estirar la prestación por desemplegu, o tener que pidir perres emprestaes a familiares y collacios pa pagar el alquiler.

Per otru llau, consideramos que esta ye una oportunidá perdida por parte del gobiernu asturianu pa nacionalizar los establecimientos d’El Arco y entamar a crear un supermercáu públicu, que combata l’especulación de les grandes cadenes y ufierte precios asequibles, llogrando tamién que les cadenes privaes se vean obligaes a baxar los precios pa poder competir. Esta ye una de les meyores receptes pa combatir la inflación, pero tamién pa salvar estos puestos de trabayu.

En resume, la Intersindical Asturiana atópase indignada énte un nuevu episodiu d’una serie yá conocida titulada “Les crisis de los capitalistes páguenles los trabayadores”, pero tamién decepcionada énte un gobiernu que consiente too esto, que nun aprovecha la crisis pa crear oportunidá y que fai una verdadera dexación de funciones de la so llabor de protector de los intereses de la sociedá.