Con motivu del homenaxe a Tino Brugos que se va celebrar el sábadu 31, la Confederación Intersindical celebró esti vienres 30 el so secretariáu n’Asturies.

La CI ye un sindicatu con presencia en tol Estáu y que defiende un modelu sindical alternativu, confederal y de clas, centráu nel centru de trabayu y basáu nel principiu de la doble soberanía (la soberanía de los territorios y tamién la de los sectores). La Intersindical Asturiana ye integrante de la Confederación Intersindical y somos el so referente n’Asturies. A pesar de nun cuntar coles facilidaes y los vínculos col réxime del 78 que tienen otros sindicatos, la CI ta consiguiendo medrar en tol Estáu, siendo mui potente en dellos sectores (como la enseñanza, onde somos la primer fuercia sindical a nivel estatal), o nel metal, onde tamos creciendo de mou enorme (somos segunda fuercia en Ford, per enriba de CC.OO.).

El secretariáu ye l’órganu máximu de la Confederación Intersindical ente plenos, y nél tán representaes toles organizaciones territoriales confederaes, ente elles la nuestra.

Nel momentu del so fallecimientu, Tino Brugos yera’l responsable de política sindical de la Confederación Intersindical, amás d’unu de los impulsores de la creación del referente d’esta organización n’Asturies: la Intersindical Asturiana.