La Intersindical Asturiana llamenta’l fallecimientu de cinco trabayadores y l’hospitalización d’otros cuatro en actu de serviciu durante la so xornada na mina.

Esti mañana, cinco compañeros finaron como consecuenciia d’un accidente llaboral que tamién dexó cuatro mancaos nuna mina de Zarréu. Según la información disponible, l’accidente producióse por una esplosión de grisú, un socesu, por desgracia, conocíu n’Asturies.

Cada muerte nel trabayu ye una firida fonda pa la clas trabayadora. Somos los y les trabayadores quienes mos vemos obligaos a vender la nuesa fuercia pa sobrevivir. Ensin ánimu de señalar culpables concretos, inclusu asumiendo que se tratara d’un accidente imprevisible, hai una realidá que se repite: les consecuencies de los accidentes llaborales siempres caen del mesmu llau, sobre los trabayadores. Enxamás sobre la patronal, a pesar de que esta xustifica los sos beneficios nel supuestu “riesgu del so capital”. Pero son los nuesos los que tán arriesgando la vida.

Que la tierra seya lleve pa los cinco compañeros caíos. Unviamos tola nuesa solidaridá y cariño a les sos families, asina como a los cuatro compañeros mancaos.

Ellos ponen el capital; nós, los muertos. Non, les rellaciones ente capital y trabayu nun son simétriques.