La Intersindical convoca fuelga xeneral de 24 hores pal próximu día 15 d’ochobre.

Reuníu’l Secretariáu confederal de la Confederación Intersindical (CI) con calter estraordinariu, resolvióse proceder a la convocatoria d’una fuelga xeneral de 24 hores pal próximu día 15 d’ochobre. D’esta miente respondemos de manera positiva a una demanda que dende hai yá más d’un añu vien realizando’l movimientu social solidariu cola llucha del pueblu palestín que pide esixir al gobiernu integrista-autoritariu de Benjamin Netanyahu poner fin a la política xenocida que se vien desarrollando en Gaza dende que comenzó la actual ofensiva militar fai yá dos años.

Esta esixencia forma parte de les estremaes demandes plantegaes pol movimientu social, referenciaes a la imposición d’un altu’l fueu inmediato, el final de la venta d’armes a Israel, rotura de rellaciones económiques, comerciales o de cualquier otra triba col estáu sionista, fin de la ocupación illegal de los territorios de Gaza y Cisxordania, respetu a los derechos humanos de la población civil palestina y demás.

Nes últimes selmanes producióse un aumentu sustancial de les movilizaciones de solidaridá y denuncia de la situación en Gaza. Esti movimientu estendióse como mancha d’aceite, abarcando tolos territorios y sectores profesionales, llegó al mundu rural, medró xeográficamente algamando a numberosos pueblos y ciudaes y conoció un significativu rexuvenecimientu de la protesta.

Un númberosu contingente d’afiliaos y afiliaes de la Intersindical vimos desenvolviendo xeres importantes dientro del movimientu social solidariu faciendo válidu’l nuesu compromisu de nun abandonar al pueblu palestín nestos momentos difíciles. Llevamos dos años presionando al gobiernu de coalición pidiendo pasos efectivos y concretos que pongan fin a les polítiques arbitraries d’Israel, quien desconoz los derechos de la población civil reconocios nel derechu internacional. Esti conxuntu de polítiques autoritaries, violentes y discriminatories motivó la petición de que seya la Corte Penal Internacional quien siente nel banquín y xulgue a los principales responsables del gobiernu xenocida de B. Netanyahu.

Tolos estos motivos llevennos a dar un pasu más haza delantre cola convocatoria d’una movilización de 24 hores pa que les clases trabayadores y la sociedá civil en xeneral puedan espresar el so refugu a la impunidá xenocida d’Israel. Con esta decisión contribuyimos a reforzar el frente social que se moviliza pol respetu absolutu a los Derechos Humanos y pol fin de la actual ofensiva militar. Les nueses conciencies pídennos dar un pasu alantre y güei facémoslo. Dende la CI facemos un llamamientu pa confluir na organización de la movilización al restu d’organizaciones sindicales que nestos díes vienen dando pasos asemeyaos al nuestru. Un ampliu frente pol respetu a los derechos humanos de cada pueblu, un refugu a la violencia y a la guerra, una defensa obstinada de los derechos humanos, son asuntos nos que les nueses preocupaciones son coincidentes.

Pola defensa de los derechos del pueblu palestín.
En defensa de la vida.
Contra’l militarismu y los presupuestos de guerra.
Pol plenu respetu a los Derechos Humanos.

3 d’ochobre, xueves, de 2025.
Confederación Intersindical