Falleció’l nuestru compañeru Tino Brugos. Nun se pue tresmitir l’estáu de shock nel que les sos compañeres y compañeros de SUATEA y de decenes de movimientos sociales y d’asociaciones nes que Tino non solo participaba sinón que yera un imprescindible nos alcontramos.

Xubiláu de recién como profesor d’Hestoria, la so actividá militante siguía lo mesmo en Cantabria, la so tierra natal, que n’Asturies, la d’adopción.
La perda d’una persona como Tino ye una traxedia pa toa Asturies. Tino atesoraba un conocimientu vastísimu de realidaes de tol mundu que contribuyó a acercar y qu’ufiertaba un analís lúcidu sobre los temes más variaos. Yera una enciclopedia viviente, pero amás y, sobre too, yera un lluchador incansable. El pueblu Kurdu- recordemos que fai unos años foi reteníu y más tarde lliberáu y expulsáu de Turquía cuando participaba como observador internacional nel Kurdistán- o va menos tiempu’l el pueblu palestín, cola so participación fundamental nes protestes recientes denunciando’l xenocidiu, van poder recordar a un lluchador exemplar. El so conocimientu sobre la guerra civil española, la revolución del 34, el POUM… diba xuníu al so constante trabayu militante en defensa de la escuela y los servicios públicos.

Defensor de la causa LGTB cuando naide falaba d’ello, sindicalista y profesor irrepetible, conferenciante, articulista… Tino, unu de los imprescindibles asturianu y cántabru nos dexónos cuando más falta nos facía.

Les sos compañeres y compañeros de SUATEA, los STES y de la Intersindical Asturiana, non solo nun vamos escaecelu sinón que nos comprometemos a que’l so llegáu continúe y a siguir enarbolando les banderes que Tino nos dexó n’herencia.
Sit terra levis, Tino. Nunca nun vamos escaecete.