Denunciamos la impunidá empresarial en Mina Miura y reclamamos la intervención urxente de les alministraciones a la par que pidimos a la sociedá asturiana amosar la so solidaridá a los trabayadores enzarraos n’Ibias.

La Intersindical Asturiana quier treslladar toa la so solidaridá y sofitu a los trabayadores de Mina Miura, en Tormaleo, Ibias, que permanecen encerraos baxo tierra pa reclamar el pagu de les nómines que se-yos deben y una salida digna a una situación que nunca tendría que se producir.

Tamos énte un casu intolerable de violencia patronal. Porque violencia nun ye namás el golpe visible: tamién lo ye dexar a families trabayadores durante meses ensin salariu, xugar col so futuru, incumplir compromisos una y otra vegada y empuxar a los trabayadores a encerrase nuna mina pa reclamar daqué tan básico como cobrar pol so trabayu.

Los mineros encerraos nun tán pidiendo privilexos. Nun tán pidiendo favores. Tán reclamando lo que ye suyo: los salarios que yá trabayaron, seguridá, dignidá y una solución real. Que en plenu 2026 haya trabayadores obligaos a baxar a les entrañes de la tierra pa facese escuchar retrata con toa crudeza’l tipu de país que tán construyendo quienes ponen la propiedá privada y el beneficiu empresarial penriba de la vida de la clas trabayadora.

Dende la Intersindical Asturiana esiximos al dueñu de la empresa, Fernando Martínez Blanco, qu’abone de manera inmediata toles cantidaes que se deben y dea la cara énte la plantiya. Basta yá de promeses incumplíes, de maniobres dilatories y d’escondese mientres los trabayadores y les sos families soporten les consecuencies.

Esiximos tamién al Gobiernu asturianu, a l’autoridá llaboral y a la Dirección Xeneral d’Enerxía y Mines qu’actúen con tola contundencia que permita la llei. Nun pue ser que les alministraciones se llenden a contemplar el conflictu dende la distancia mientres dellos trabayadores permanecen encerraos en condiciones durísimes, con fríu, humedá y riesgos evidentes pa la so salú. Si una empresa nun paga, nun garantiza condiciones dignes y nun cumple les sos obligaciones, les instituciones tienen qu’intervenir. Y tienen que facelo yá.

Asturies conoz demasiado bien lo que significa la mina. Conoz el trabayu duru, el riesgu, la enfermedá y la muerte. Pero tamién la solidaridá y el compañerismu. Por eso esti conflictu nun pue vese como un problema aislláu d’unos pocos trabayadores nun rincón del suroccidente. Ye un problema de toes y toos. Ye una cuestión de país. Ye la espresión concreta d’un modelu nel que se socialicen los sacrificios y se privaticen los beneficios; nel que se-yos esixe paciencia a quienes nun cobren mientres se tolera la impunidá de quienes incumplen.

La Intersindical Asturiana llama a la clas trabayadora asturiana a amosar el so sofitu activu a los mineros encerraos y a les sos families. La solidaridá nun pue ser namás una pallabra guapa pa los discursos: tien que convertise en presencia, presión y acompañamientu.

Nengún trabayador tendría qu’encerrase baxo tierra pa cobrar el so salariu. Denguna familia tendría que vivir pendiente de les escuses d’un empresariu. Denguna alministración tendría que mirar pa otru llau cuando se vulneren derechos llaborales elementales.