LA INTERSINDICAL ASTURIANA ESIXE UNA SOLUCIÓN INMEDIATA PA LOS TRABAYADORES DE MINA MIURA
La Intersindical Asturiana quier treslladar públicamente’l so sofitu a los trabayadores de la esplotación minera Miura, en Tormaleo, que traviesen una situación llende tres meses d’incertidume llaboral y económica.
La situación que viven estes families resulta inadmisible. Decenes de trabayadores siguen ensin percibir los salarios que-yos correspuenden dempués de desenvolver la so actividá nun sector especialmente duru y castigáu históricamente. La falta de respuestes per parte de la empresa ta empuxando a munches families a una situación insostenible.
Dende la organización sindical consideramos especialmente grave que, una vegada más, los trabayadores seyan quienes paguen les consecuencies del abandonu industrial y de l’ausencia de polítiques reales pa garantizar emplegu estable y condiciones llaborales dignes nes comarques mineres.
Asturies nun pue siguir permitiendo que quienes sostuvieron mientres décades una parte fundamental de la so economía y de la so identidá industrial queden dafechu desamparaos énte conflictos llaborales d’esta magnitú.
Reclamamos a la empresa l’abonu inmediatu de les cantidaes adeudaes y esiximos a les alministraciones públiques qu’actúen con responsabilidá pa evitar qu’esta situación siga agravándose.
Mañana entamen una marcha dende Tormaleo hasta Uviéu pa presentase énte la Xunta Xeneral y solicitar que’l Gobiernu del Principáu interceda y se busquen soluciones a la so situación. Dende la Intersindical Asturiana entendemos esta movilización como un exemplu de dignidá obrera y de llucha colectiva frente al abandonu y la falta de respuestes.
Facemos tamién un llamamientu a la sociedá asturiana pa amosar solidaridá colos trabayadores afectaos y coles sos families, que lleven demasiao tiempu soportando una situación inxusta ya intolerable.
Pola defensa del emplegu dignu, de la industria asturiana y de los derechos de la clase trabayadora.