La Intersindical Asturiana asistió ayer a la manifestación del 25N, Día Internacional pa la Eliminación de la Violencia contra les Muyeres, p’acompañar a la ciudadanía movilizada y reafitar un compromisu firme: nin un pasu atrás frente a la violencia machista.

La violencia contra les muyeres nun ye un fechu aislláu nin “domésticu”: ye una violencia estructural que s’espresa en feminicidios, agresiones sexuales, acosu, control y amenaces, violencia psicolóxica, económica ya institucional, trata con fines d’esplotación sexual y violencies dixitales. A estos tipos de violencia súmense, con especial crudeza, les violencies que traviesen a muyeres migrantes, muyeres con discapacidá, muyeres mayores y moces, y a quien padez precariedá y dependencia económica.

Dende una perspectiva de feminismu de clase, recordamos que la muyer trabayadora ta doblemente oprimida: pola so condición de muyer y pola so condición de trabayadora. La precariedá, los salarios baxos, los contratos parciales non deseyaos, la temporalidá y la falta de recursos habitacionales y de cuidaos dificulten romper cola violencia y aumenten la vulnerabilidá. Por eso, combatir la violencia machista esixe tamién polítiques llaborales y sociales que garanticen derechos, autonomía económica y servicios públicos fuertes.

Recordamos que los feminicidios siguen arrebatando vides cada añu y que miles de muyeres viven en situación de riesgu o tuvieron qu’activar mecanismos de protección. Detrás de cada cifra hai una vida, una familia, un entornu y una comunidá golpeaos.

Frente a los discursos negacionistes y a la banalización del machismu, denunciamos l’avance de la estrema derecha, que pretende borrar la violencia machista del debate públicu, cuestionar les polítiques d’igualdá y desllexitimar al movimientu feminista. Esa estratexa nun ye inocente: alimenta la impunidá, refuerza la cultura de la violencia y pon en peligru derechos y conquistes llograes tres décades d’organización y llucha. Ante esti retrocesu reaccionariu, reafitamos que nombrar la violencia machista, combatila con recursos y defender servicios públicos fuertes nun ye una “ideoloxía”, sinón una urxencia democrática y una cuestión de xusticia social.

Dende la Intersindical Asturiana llamamos a caltener la movilización y la organización feminista nos centros de trabayu, nos barrios y nes aules. La llucha contra la violencia machista ye una xera colectiva y urxente: poles que nun tán, poles que resisten y poles que vendrán.